05‏/12‏/2013

مقلوب 90ْ .


لما نقرر أننا نبدأ سنة جديدة، نتغير فيها ونعيش حياتنا بشكل مختلف، ننسى كل الماضي، ننسى اللي جرحونا واللي تركونا في نصف الطريق، ننسى كل القهر والألم، نبدأ حياة جديدة ونبدأ نحلم من جديد ونتعرف على ناس جديدة، حتى ضحكتنا نغيرها لضحكة جديدة، ونسمع اغاني جديدة ونقرأ كتب غير انواع الكتب اللي كنا نقراها، ونشوف افلام غير الافلام اللي كنا نحبها اول، ونحب اشياء ماحبينها لأن عمرنا مافكرنا نجربها، يمكن لو جربناها نبطل نحب اللي كنا نحبه ونحبها، نتعرف على ناس كثير، ونستمتع ونلون حياتنا أكثر.

نقرر أن الروتين مايدخل حياتنا ابداً ولا يعرف لها طريق، ويكون كل يوم في حياتنا بشكل مختلف، نغير كل تفاصيل حياتنا، حتى ادق التفاصيل نغيرها؛ نغيرها للأحسن اكيد، وللأفضل وللأريح وبالطريقة اللي تخلينا نتمسك فالحياة أقوى ونحبها وتحبنا، نبغى نعيش واحنا متسمتعين، ما نضيع ولا لحظة في حياتنا، ولو ضاعت مننا نغمض عيوننا ونتخيل اللحظة فراشة ورديه؛ جميلة ودنا نمسكها زين عشان لا تطير من ايدينا ونفقد جمالها وتروح مننا.

في ٢١/١ هجري .. كملت ١٩ سنة، قبل مريت بأسوا سنة في حياتي، وعشت ومريت بأيام اتمنى أنها ماتتكرر طول ما أنا عايش، الساعة ٢ الصباح والسماء سوداء وعدت نفسي إني امسح كل الذكريات اللي عشتها من قبل، وانسى كل التفاصيل الحلوه والمره، وعدت نفسي إني ابدأ من الصفر لين التلريون. وعدت نفسي بوعود كثيره، وعود حلوه أتمنى تصير ولو ماصارت بحاول لين تصير.

لما تمر ايام وتضيع فيها احلى لحظات حياتنا اللي ممكن اننا نعيشها، نضيعها في بكاء وحنين وشوق، نسمع فيها اغاني حزينه ونقرا فيها كلام عن الفراق، نلبس الوان غامقه ونبعد عن اي مكان فيه ضوضى ونلجى للأمكان المشؤومه واللي تخلي البني آدم يأس ومحبط ومع نفسه في عزلته، ويجي اليوم اللي لازم نوقف كل هذي الحكاية البائسة، ونغمض عيوننا وننسى كل ألم عشناه قبل، ننسى كل اللي خذلونا تركونا واللي جروحنا واللي بكونا وكسرونا ودمرونا، وقبل لا نتفح عيوننا نوعد انفسنا اننا كل ما عشنا لحظة مريره ناخذ العبرة منها، ونغمض عيوننا وننساها، ونوعد انفسنا اننا نعيش حياتنا مبسوطين رغم كل الظروف اللي راح تواجهنا، ونفتح عيوننا ونشوف ذي الدنيا الجميلة بكل تفاصيلها.

الحياة جميلة ، وكل ما غلوصت غمض عيونك وتخيل شي جميل، عيش حياتك وأنت تحلم مصير الحلم يصير واقع في يوم، خلك حالم طول حياتك، احياناً الواقعية الوانها مزعجة.

لما تضحك اضحك بصوت عالي، ولما تتنفس تنفس ببجاحة، لما أحد يزعلك رح وعاتبة *لوكان يهمك*، انت لنفسك ونفسك لألك، أعرف اصحابك زين وأعرف مين يحبك ومين اللي ماخذك طيش، بطل تسمع اغاني حزينة، خلك صادق وواثق من نفسك وقول كلمتك وابد رأيك واللي ماتعجبه يبلط البحر، قول لنفسك دايم أنك جميل وعيونك حلوه، وصوتك لما تغني تطرب فيه مسامع الناس، غن دايم حتى لو كان صوتك نشاز. لو كانت ايامك سوداء غمض عيونك وأقلب ايامك زرقاء وخضراء وبرتقالي -وأصفر؛ احياناً الالوان الفاقعة تجلب السعادة- ، ألبس اللي يعجبك وكُّل اللي يعجبك، حتى حركاتك سوو اللي يعجبك، تكلم بطريقة اللي تعجبك، واللي مايعجبك لا تطالع فيه، وماهو شرط أن كل الناس يحبونك، خلك مثل الوردة تنفخ عطرها ومايهمها أنها تنال إعجاب أحد لأن كل الي يهمها أنها تستمع وهي تبث عطرها في كل مكان، خلك سحابة تمشي وتمطر .. عيش حياتك بطريقتك ماهي بالطريقة اللي فشلوا فيها وحبوا يجبرونك أنك تعيشها، ولاهي بالطريقة السيئة اللي يحبون أنك تبان فيها قدام الناس. صف نيتك وعيش، ولا تكون عاشق خلك دايم معشوق، ولا تدور ع الحب ولو جاك فجأه عيشه بكل تفاصيلة.

أنت جميل وعيونك جميلة، حتى صوتك يشبه الأسمر .

* (أعظمُ النجاحات تأتي بعد أَقسى الصدمات) عبدالله المغلوث.