عندما استيقظ.

سألوني وينك مالك حس ؟ سكت خمس دقايق، وارسلت لهم قلب معه ورده وختمتها بنقطه.

مدري برود ولا تبلد ولا سُبات عن الدنيا مافيها، بس ماصارت اشياء تحوم في راسي ابداً ! احس كل شي فيني نام وكأنه خلد للسبات الشتويّ، صرت اسكت كثير وأتأمل اكثر، حياتي صارت مختصره على اكل ونوم واغاني وافلام وقراءه بعض كتب التفائل وحب الحياه والأمل، وبقية حياتي حنييييين لحبيبي، وأخ يالحنين.

اذكر انها كانت عندي احلام وعندي امنيات وعندي طموحات، اذكر اني كنت احب كثير ناس حولي وكنت احس فيهم واحس حتى بوخزة الابره، بس الحين ما ادري وين راحوا ! احس كل امنياتي هو ان حبيبي يرجع لعيني وبس.

قبل لا أحب صدق، كنت احس الحنين اغنيات اشتياق وكلام وشوية صور، والحين عرفت ان الحنين شَتات منظم، يبعثر قلبك بس يرتبه في نفس الوقت، يخليك طاير ف السماء بس تمشي ع الارض ! يخلي عيونك ما تشوف الى حبيبك ويخلي لسانك ما يبغى ينطق الى له، ودك تصيح وسط كومة ناس بس محد يسألك ليش تصيح !

لذة حنينه مُّرة؛ بعض البشر يستطعمون الليمون مع انه مر ! ذا هو الحنين، مر بس له طعم. وأخ يالحنين.

انك تحن لبني أدم بس ماتسمع له اي خبر ذا هو اقسى انواع الحنين، مايربطك به الى شوية صور وكلام كان بينكم، ودك تشوفه ولا تسمع عنه خبر، ودك تشوف هو بخير - هو مبسوط وحياته سعيده، ودي اعرف شخباره وبعد ما يطمنوني عليه بكمل حنيني، وراح ارجع واطلب اني اسمع صوته وبعد صوته لقى وبعد اللقى حضن وبعد الحضن وطن، ذا الحنين يعيشك في دنيا انت منت عايش فيها وفجأه يصحيك ويقولك اصحى يا اعمى حبيبك راح ! '(

الحنين انك تدفع اي شي تطلبه منك الحياه بس ترجع لك حبيبك ولو لحظه، الحنين انك تموت بس تعيش على ذكريات حبيبك، والحنين يقنعك ان مهما قست معك الدنيا راح تزين في يوم وراح يرجع حبيبك لك وراح تتعوض كل لحظه عشتوها بعيد عن بعض ! الحنين صورة رماديه مالها ريحه ولا لون ! الحنين شكل من اشكال الانكسار.

ماني حزين بس حنيت لحبيبي، ودي نرجع.