16‏/02‏/2014

الإحساس نعمة.


المشاعر وأخ يالمشاعر .. عشت فترة محروم من اي شعور، لا أحب ولا أكره ولا أحس ولا أشوف ولا أسمع ولا اقدر اقول شي صادق طالع من قلبي، كنت عايش في حياه أشبه بالجفاف، وأخ ياهذي الفتره رغم انها بشعه بكل تفاصيلها الى اني ماني قادر اكرهها لأنها علمتني قيمة المشاعر اللي ما أتوقع احد ممكن يقدرها قبل لا ينحرم منها.

لما يقولون لك كلام يجرح - اغلى الناس يقولك أنه لازم يبعد عنك بدون اي سبب تعرفه - لما تنحرم من الاستمتاع بأي اي شي تعيشه ولما تعيش وحده فظيعه رغم كل الناس اللي حولك - لما تنحرم من اشياء كثير و تكره الحُب عشان تجارب غلط عشتها، لما تخاف تثق في إي انسان يتقرب منك على هيئة صديق؛ خايف لاتتعلق فيه ويبعد. لما تكون انسان بس بلا إحساس، هنا تقدر تعيش في فضاضة وإستغراب بعد ماتستوعب اللي أنت فيه ! تفز من غيبوبتك وتطالع في نفسك لوين وصلت ! وين أنت الاول ووين الناس اللي حولك وين روحك ووين إحساسك، وقلبك مع كل سؤال تسأله نفسك يرجف خوف، حيرة وتساؤلات وملامح استغرآب وماعليك الى أنك تسأل نفسك كثير (انا وين وقلبي وين والدنيا الطيبة وين) !.

قد ما أقول الى انك تعيش بلا إحساس وبلا مشاعر؛ بس تتنفس ! هذا ابشع شعور.

تفاصيل رجعت لي الشعور، كأصدقائي وإنسان ساعدني ووقف معي وقفة أخ يحس بألم فقدك لشيء غالي عليك - صديق قديم وأتصالات منتصف الليل وإسترجاع ذكريات قديمه - ريحة عطر شتوي بذكريات جميلة - الصلاة والموسيقى، شوية تفاصيل رجعت لي الإحساس والشعور بالحب والعطف، بالسعادة وبالوفاء والإمتنان، الشعور بالجمال والراحة، أحاسيس كثير فقدتها وأختفت بهجتها من حياتي.

كلنا عندنا هذا الإحساس والشعور واللطف والحُب والثقة والأمتنان للأشياء الجميلة اللي تصير حولنا من الناس الرائعة اللي يعيشون قدام عيونا بس ينتظرون منا حُب وكلام لطيف، الإحساس جميل ولازم ما نفرط فيه عشان تجربة عشناها وفشلنا فيها. تجربة حُب فاشلة ماهو شرط تكون انت الفاشل ! تجربة صداقة أو تجربة إبداع او اي تجربة ممكن تمر علينا فالحياة لو فشلنا خلونا نجرب مره ثانيه بنفس القوة اللي كنا نمتلكها فالمرة الأولى، وراح يجي اليوم اللي ننجح في كل تجاربنا ونفرح ونعيش ونضحك والسعادة ماهي شايلتنا.

لفترة كرهت كل التفاصيل وكل العلاقات ، كرهوني فالحُب وفالصداقة ، كرهت أجمل علاقتين لأني فشلت فيها، بس صحيت وراح أحب واتعرف على ناس أكثر، راح أعيش وأستهلك كل تفاصيل الحياة اللي عطاني ربي، لأن انا عندي إحساس ومشاعر جميلة، لأني انا انسان أحب من قلبي واصاحب بكل وفاء وإخلاص، ولأني مؤمن بأن الاشياء الجميلة ماتروح الى للناس الي داخلهم مبطن بالجمال؛ ويكفي أن عندك إحساس عشان يكون داخلك جميل.


الإحساس والمشاعر نعمة أحمد ربك عليها، وأصحى تفرط فيها عشان اي شي ممكن يصير لك فالحياة.

هناك 3 تعليقات:

  1. الاسوء بعد ماترجعلك مشاعرك انك تخسرها مره ثانية وتحااول وتقااوم تخرج منها لكن في المره الثانية اصعب , تكون عفت العلاقات والصداقات والدنياا حتى الاشياء اللي كنت تحبها تخسرهاا

    جميلة جداا فضفضتك قريبة من القلب والروح
    اتمنى لك رحلة امنه مليئة بالسعادة وتنتهي رحلتك بسلام 3>

    ردحذف