سحابة في ربيع الفضا

انا كالفضا كالسحاب ككلشي متحول لا يبقى على حاله، ابقى دائماً منتصراً حتى في اشد الهزائم وابقى دائماً حراً حتى في اعنف العبودية، ولأني سحابة بلا قيود واسبح في عرم الفضا بحريتي اذاً انا اتغير واتقلب كما يحدث فالطقس حولي وكما اشاء وكما يحلوا لي.

خلك سحابة، تعيش في مملكتها لوحدها، مملكه تكون ملكة عليها، ولها كامل الحريه وكل الحقوق (في وطنها)، خلك دايم تعطي ولا تفكر ابداً انك تاخذ، خل داخلك دايم وطن أبيض عنده مبادئه وقيمه وطريقته في عيش حياته، ومهما صار قدام عينك لا يأثر على هالوطن اللي داخلك، خلك دايم مثل السحابه؛ رغم العواصف والرعود اللي من حولها الى انها فالأخير قادره على انها تهطل بذاك المطر اللي يشفي قلوب الناس اللي يتأملونها.

سحابة تسبح وتطير في هالفضا بمطلق حريتها، تهمش اي شيء ممكن يوقفها وفي اي لحظه ممكن تعطي المطر وتنعم اللي يطالعون فيها من تحت ويشوفنها صغيره، تعطيهم من خيرها وتعلمهم أنها قادره تسوي شي لو قعدوا الزمن كله ماراح يقدرون يسوونه، تعلمهم ان مهما كانت نظرتهم السلبيه لها راح تظل تعطيهم من خيرها، لأنها بالمختصر؛ لما تعطي هي تعطي نفسها هي تغذي وطنها وهي توسع داخلها وتزرعه شجر و ورود وتملأ نهرها بالماء الطاهر، لأنها بيضاء ولأنها طيبه ولأن مافيه اي شيء يقيدها اذاً هي قادره انها تعطي وتعطي لين مايحبها ربها ويشيلها من الفضا لحياة تعطيها ولا تاخذ منها؛ للجنة.

سحابة تغني وتعيش، تحقق احلامها وتصادف السحابات الطيبه البيضاء اللي عندهم وطن يشابه وطنها، وطن آمن وصافي، وطن أبكم مايعرف يتكلم، لأن لغتهم الوحيده واللي يجيدونها بكل فصاحه، لغة الأفعال.

سحابة ماتوعد، بس كل ماحست ان قلوب الناس بدأت تجف هطلت. سحابة تحب ولا تطلب حُب. سحابة تآمن وتظل اذا حست ان الشمس زعلت وفاض نورها؛ تحظن هالدنيا رغم ان الشمس قاعده تألمها بس تتحمل وتصبر لأن حظنتها للناس توفي كل الألم اللي ذاقته، لأنها ماتحس بالألم فاللحظة اللي تعطي فيها ، لأنها بيضاء.

خلك سحابة تعيش وحيده بس عندها كل هالكون، خلك سحابة كبيرة تتبختر بنفسها، سحابة سعيدة؛ شتوية ولا صيفيه، سحابة طايره في هالفضا ولا تسمح لحد يطولها او يمسكها، بس من بعيد يتأملون جمالها ويسمون عليها، سحابة نقية وموسيقيه، اصدقائها النجوم والقمر، والبلابل اللي تنزل عشان تزورهم وتشيلهم على اكتافها وتسبح فيهم، سحابة بكماء، أليفه بعيده عن الشمس قريبه من الجنة والريحان وعرش الرحمان، سحابه تحلم وعندها عيون حلوه وتفاصيل مختلفه، وكل سحابة وسحابة غير عن السحابة الثانية، بس كلهم جميلات.

* تأمل السحاب وخلك دايم سحابة - خلك دايم طاير ، خلك دايم مع نفسك ، خلك أبيض - .